高知名度的本地零售股

「高知名度」的莎莎國際(178.HK)於今日收市後公佈了全年業績,全年虧損了HK$3.44億,比起上一財年的虧損HK$3.51億其實分別不大。如此下去,要生存都成問題,派息就當然欠奉了。

大家也看看另外幾間最近都公佈了業績的「高知名度」零售上市公司: 維他奶(345.HK)、大家樂(341.HK)、大快活(052.HK),筆者覺得它們的業績即使以「慘不忍睹」來形容也不為過。

唔知係咪因為筆者係會計仔,筆者從來揀選「長線組合投資成員」的準則係考慮業績、睇資產負債表、睇股息率等等,而並非以上市公司的「知名度」作首要考慮,也不會認為只須要「巡一巡舖攞個感覺」就可以落實投資決定。

筆者的Touch Wood警示:

由於近日本地疫情又再冉冉上升(昨天本地感染已超過二千宗),筆者較悲觀地估計本地与內地通關之日子又要稍等了! 但就算真係可以恢復通關,筆者「有信心」本地零售消費額已「不可能」恢復到疫情和社會事件前的水平,因為人心已變,國內外旅客來港消費的興趣已大不如前了。

大家要小心,筆者個人估計仍然不停虧損的零售上市公司,是有可能會突然公佈「供股方案」的。(I am touching wood!) 若然你現在仍然係股東,最好都係有這個心理準備呀! 🙏

除淨三弄

昨日傍晚,筆者持有之626.HK(大眾金融)公佈了派發今年中期股息每股HK$0.05,除凈日為7月14日,派息日為8月3日。

今天900.HK(Aeon Credit)除淨,末期息為每股HK$0.22,包括筆者在內,投資者若「昨日收市後」仍持有900.HK,就將會於7月15日收到股息。今天上午它股價收於HK$5.00,最新股息率為年息8.8厘。筆者無投訴,算滿意了。

明天輪到1606.HK(國銀租賃)將會除淨,末期息為每股HK$0.10908(=RMB0.09307),包括筆者在內,投資者若於「今天收市後」仍持有1606.HK,就將會於8月10日收到股息。

長期投資股票以「收取股息為宗旨」就是如此沈悶。朋友,撫心自問,你適合這種投資方法嗎?

1606.HK 除凈前開車?

國銀租賃(1606.HK)是國家開發銀行在香港上市的唯一親生仔,背景無可置疑。

後日(30/6/2022)便會除淨@RMB0.09307/share。

執筆時股價HK$1.14,市盈率只係約3倍,每股資產淨值於31/12/2021約係HK$2.8(筆者以最新人民幣匯價計算)。

個人認為1606.HK或會有注資,或最終會被私有化。但...唔知要等到幾時!^^

深海一號 祖國的驕傲

感謝網友 健一兄弟 於前日(星期日)第一時間通知筆者有關「深海一號」的最新消息。

筆者不喜歡抄書,大家有興趣的話就不妨自己上網search一下中國海洋石油集團的「深海一號」有多巴閉! 

東方表行 再「接」再厲

筆者有時也算係「硬頸」,即係自己認為啱嘅嘢,就很難接受其他人的意見。

當然最終筆者也有可能真係啱嘅。

希望下面做了個啱嘅投資決定:~ 

雖然筆者上一篇文係講過「估算未來兩、三星期都不再需要有任何股份變動」,但筆者今早就把上星期四晚才收到的中石化(386.HK)末期股息,差不多盡數買入東方表行(398.HK),連手續費成本大約@HK$4.61,係於11點半前的交易。之後佢都叫做守得穩,算係有個「彩」了! (廣東話:「彩」者,即「運氣」也。)

都算係冇改變組合成員。

如此,筆者投資户口內的剩餘現金又再次變少了,只剩低萬三蚊! 但筆者預期「未來一年的股息收入」又會被提高了,「組合年平均股息率」又被拉高了,筆者內心的感覺是更踏實。

為何要再增持?... 398.HK上星期四晚宣派每股股息共HK$0.405, 以股價約HK$4.6去計算,遲D除凈後即係大約「變為」HK$4.2,到其時:

市盈率(PE)=4.2/0.744=5.65

股息率(DividendYield)=0.749/4.2 x100%=17.83%p.a.

網友們認為這兩組數字夠吸引未? 

有冇其他零售股吸引過佢? (這個...Student肯定會有網友答: 有! 然後Student says: No problem! ^^)

硬道理倉未來一週日誌

由於筆者此時此刻較滿意自己的「硬道理倉」內組合成員及比重分配,所以筆者估算未來兩、三星期都不再需要有任何股份變動。

等到7月15日,筆者的投資户口就會收到883.HK和900.HK的豐厚股息,到時先再考慮想買些甚麼好東西。

硬道理倉未來一週日誌:

28/6 : 626.HK公佈中期股息(筆者估計佢會派和去年一樣的中期息,即每股派HK$0.05)

29/6 : 900.HK除凈(@HK$0.22/share)

30/6 : 1606.HK除凈(@RMB0.09307/share)

總之,唔理有理定無理,收息便是硬道理!^^

大發現: 筆者十分感謝首位有興趣「追蹤」本網誌的網友Karen Wong, 妳的追蹤賜予筆者很大的鼓勵去寫好以後每一篇短文和努力揀選優質收息靚股。^^

Karen Wong, 筆者於此祝福妳!🙏😃

中海油 硬道理

過去一週,恒指被一眾科技股的帶動下而升了六百幾點,但很不幸,筆者的總倉值則向反方向走。現在唯有檢討一下。

本週筆者的股票組合最大變化係把1919.HK和386.HK都先後沽清,把套現主要換入了883.HK(即係增持)及941.HK(成為新成員),又再買了些398.HK(即係增持)。

因此,網友可以估計到筆者現時的「硬道理倉」(見註釋)內,883.HK已經係頭號馬,即任重而道遠。另外,筆者預計自己的「組合年平均股息率」又再升高了些。

但過去一週,883.HK就從上星期五(6月17日)的收市價HK$10.52,跌至本星期五(6月24日)的收市價HK$9.86,即全週共下跌了HK$0.66,等於6.27%! 

其實筆者感覺係「很無厘頭」。有睇過筆者這網誌的網友應該知道筆者對國際油價與883.HK盈利關係的睇法。雖然筆者只係很粗略的推斷,但筆者目前仍然認為自己的預測已算係保守。

故此筆者現時真係「找不出理由」去作出調動。

註釋: 筆者認為「長期靈活投資股票收取相對超高股息才是硬道理」,故引出「硬道理倉」一詞。^^

萬事俱備 只欠「東」風

東方表行(398.HK)昨晚公佈了全年業績,即Year Ended 31March2022。大家可以到aastocks.com內作詳細研究。

依家執筆時,佢股價係HK$4.68,市盈率只係6.29,全年股息率為16%(遲D除凈後,股價調整了,更加會「變」為17.5%)!

派完息後,銀行及現金結餘仍有多於10億港元,佢仍然係「凈現金牛」,而且每日仍在做生意賺錢。

咦,好似好靚喎?!

若有人問筆者: "那為何佢「炒唔上」?"

...Student says," 唔識答你!" ^^

實力股AEON CREDlT(900.HK)

900.HK(Aeon) 公佈了首季業績,即1Mar~31May2022。詳細內容筆者唔講了,大家可以去aastocks.com慢慢研究。

想講嘅係: 大家還記得本地3月及4月的零售市況嗎? 筆者以兩個字來形容: 慘淡!

筆者只係會計仔一名。現今雖已屬於95%退了休,但還有處理大約等於以前客戶5%數目的賬。其中一個client就係經營做一間零售實體舖,係位於中區某商場內,係賣耐用必須品的。

慘成点呢?...今年3月份的生意額只係約等於正常月份的一半! 講緊嘅係Turnover/Sales,而並非Net Profit,但一切固定開支,如租金、管理費、薪金等都冇變,當然還有很多其他非固定支出: 清潔費、電費、電話及上網費、維修保養費、膳食費、交通及運輸費、雜費等等等等,所以當月份實際當然係incurred a loss! 

Aeon主力係做信用卡生意,都算係與本地零售市道(線上及線下)有關聯。於此疫情非常時期,它都仍算係每季穩定地有Net Profit,其實已優勝過很多本地「名牌」上市零售股。

雖然Aeon股價的確係悶D,但佢過去季季都有錢賺,年年都有高息派。有股如此,夫復何求?^^

考考自己眼光: 東方表行

宜家係下午3点幾,筆者剛才又買多一萬股398.HK@HK$4.67。這是筆者最近第三次買佢,之前係無貨嘅。

它已經出了盈喜,今天收市後或可能明天開市前1至2個鐘頭(上年係咁樣!)便公佈全年業績及分派。

筆者係「博」佢增加派末期息嘅。(去年末期息+特別息=HK$0.39/股)

另外,筆者對佢於大陸市場的業務前景係非常正面嘅。唔係賣手錶咁簡單,係賣收藏品,係用嚟保值,尤其於現今環球經濟諸多不明朗因素之下。

大家都係聽下罷了,因筆者都係「博」嘅咋! 當然希望佢「值」啦!^^

「油股」終極版

今早開市後幾番猶豫,終於把組合內剩餘的386.HK也掛沽@$3.51,最後都總算全數成交才見佢掉頭回落。

一直有觀察油價及A股整體情況。

目標當然係想再換入中海油H股883.HK。

執筆前,883.HK卒之又再跌落10蚊留下了！估佢唔到!

行動最實際,買入@$9.99。數量係攞個持倉整齊「好意頭」數字就夠了。有餘錢剩。

再看看東方表行(398.HK),見$4.69可試,就入多佢1萬股。連同上次平均數,都只係輕微提高平均成本價。它明日便會公佈全年業績及分派。

投資户口內還有餘錢剩,但不多了。暫時都真係要冷靜一下。

明天會收取386.HK的末期息,及看看900.HK和398.HK的最新業績,才再作打算。^^

收市後記: 

今日國際油價係整日「陰跌」! 頭先4点前紐約WTI期油低見USD103.22/桶。想「嚇死人」! ...但唔知点解,4点過後,筆者又見佢向上升返上USD104,真係好似有資金「想玩嘢」! ...當然,這種極短期的價格波動是未能反映今晚半夜呀拜登的豪言偉論!^^

有懷疑就...「變」!

昨天收到網友 健一兄 之温馨提示(詳見上一篇文章之最後留言),係關於1919.HK過去一年多(包括今年第一季)的「成本高增長調查」。

筆者考慮過後,於今早及下午決定做了以下「換馬」交易:

1. 沽清1919.HK,均價HK$12.50。

2. 將套現的約一半,增持買入883.HK,@HK$9.97。

3. 另外約一半就買入941.HK,@HK$49.45。

筆者之前係有941.HK的,但在除凈前以HK$52.95沽走,雖然冇末期息收,但今日以HK$49.45再入返相同嘅股數,感覺係Okay嘅。中移動係悶D,但市況不明下就係保守些算了。佢都算係現金牛,算係無咁受美國加息影響。

上日油價「急跌」,中海油今日AH股齊齊向下。筆者不知下半年油價走勢如何,但現時油價還企於US$100上面,照估計中海油仍然係「勁賺」,及仍然可以派「超高股息」,佢跌得急我就幫幫手托。

如此買買賣賣,筆者預計自己的「組合年平均股息率」又升高了一些。941.HK股息率和1919.HK差不多(其實後者明天便會除凈,但筆者信心已受損,無計!),但另外的883.HK,就應該相對地大幅度高息率過1919.HK了。

基本上仍然係「樂觀地」全倉持股收息。^^

「油股」調動2.0

筆者今早再調配倉內「油股」比例。

再沽出部份386.HK(中石化),然後盡量換入883.HK(中海油)。調配後兩者都仍係「萬位」整數,都係可以方便自己記住。

與上日一樣,都係「無須」加新錢入投資户口內。

如此一賣一買,若只以筆者組合內這兩隻油股作計算,中石化與中海油的持倉比例,就由調配前嘅約2:8,進一步變為依家最新嘅約11:89。

大家當係「聽故仔」好了。記得左耳入右耳出... 多謝! 🙏

題外話: 睇見BillySir Blog 內的「天才與白痴」標題,突然想起歌神SamHui的「天才白痴夢」歌詞兩句: 「振翅高飛,無須在夢中。」大家互勉之。^^

調動組合內「油股」比重

筆者今早9:15am前以競價限價盤掛沽出部分386.HK@HK$3.60。最終競價盤只以HK$3.58成交。但筆者很幸運,於9:30am正式開市後,我掛沽的HK$3.60都被人掃走,即成交了。

之後,就將兑現的錢盡量換入883.HK,落盤HK$10.82,然後成交了。這個價,現在睇返轉頭,就稍為高了一點,但當時的最低價係HK$10.80,...我哋做投資買賣總不能事後孔明吧?

新入的貨,加埋組合內已有的883.HK數目,便構成「萬位」整數,方便自己記住,而且今早這Stock Switching還有萬二蚊cash凸剩出來,筆者感覺良好。連同户口內昨天剩低嘅8千幾蚊cash,即現在有可投資餘額約兩萬蚊,... 或可隨時攞嚟做家用都未定。

最重要係無須加新錢去投資户口。

如此一賣一買,若只以筆者組合內這兩隻油股作計算,中石化與中海油的持倉比例,就從原先嘅3:7變為依家嘅2:8。

依家已經係6月中,筆者目前對中海油上半年的業績和派息有較大的信心,即信心係多過中石化,因此做了上面的調配。

「迪生創建」又派息了...

網友BillySir在他的Blog內講到迪生創建(113.HK)今次派息和去年相同,業績內容就「費事看」了。咁都啱嘅,大多數投資者買賣股票就係睇住兩樣嘢:股價+股息(筆者較看重股息率)。

筆者也不「抄書」了,讀者如有興趣,可以自行到aastocks.com內睇睇業績公告,有如年報般詳細的,也有簡易版的公告。

但筆者想講,迪生手持巨額現金,雖然話因此公司可以「應對全球即將來臨之經濟衰退及極度艱難的零售環境」(節錄自"前景展望"),但它持有凈現金HK$20.45億港元 是否過份多呢?要知道它的已發行股份數目只係3.942億股而已,即係話每股凈現金約HK$5.20 !

而且迪生還有「其他金融資產」共HK$19.5億港元,即係每股約有HK$4.95 !

但這「其他金融資產」,過去一財年就帶來了4千多萬港元的虧損。

作為小股東,可以做的不多,筆者謹在此冀望呀迪生 生性、 務實D、唔好亂咁投資,把「部份」過多的現金派些少「特別股息」惠劳股東們,則皆大歡喜了!

還有,管理層最好扚起心肝,大力開拓廣闊的大陸市場。有辦你睇: 東方表行。

迪生,加油呀!^^

再加入「東方表行」

筆者剛入了些398.HK,平均價係<$4.50.

以前曾是筆者愛股之一。

它一直係現金牛,近幾年派息慷慨,係「超高息」股票。

昨晚公司出了全年盈喜。

東方表行最大賣点係已開拓了大陸市場,已見到成績,估計還在增長中。

這股我暫不打算短炒,打算長倉持有。^^

補充: 很高興買返398.HK,它的超高股息率又可即時提高了自己的「組合年平均股息率」,內心感覺很踏實。不過,投資户口內又只剩返幾千蚊了,要等下星期四收取中石化(386.HK)的股息才有資金再入市,... 除非做些StockSwitchings,但做這些要比較「個股」的即時價格,要衡量估值高低、比較股息率、考慮值博率、交易成本等等,其實就是考慮 買入和賣出 ,因此,筆者也不知幾時有機會可做。

再戰明天

筆者都係個很普通的小散戶,資金有限、冇團隊、冇後台、冇內幕消息,平時都係靠上網睇財經資訊來做投資決策。

筆者平日都有做些短線買賣,但並非經常做,且銀碼相對長線倉算係極少數目,這個當然了,純粹考考自己的眼光,最後贏輸都會走。

明天收市後,另一隻長線倉內的「悶股」迪生(113.HK)將會公佈全年業績,這股份筆者於幾年內都有些加加減減,始終一直持貨,和Aeon Credit(900.HK)一樣,係有些感情。^^

今次它已發了盈警,已知它賺了約2.1億港元,即每股約賺HK$0.53。但最重要嘅係:它會派多少末期息? 及有冇特別股息?最近它股價已上了HK$4,不知有何啟示? ... 不知道!

二劫

昨晚美股再次大跌,今天「二劫」已無可避免。即星期二劫數難逃!(再一笑)^^

今輪股災,源於通脹、利率。原來利率對經濟有這麼重大的影響力。

筆者腦袋內又再想起這句子: 持有超高股息的才是硬道理!

今早再次面對「重要關頭」,再次需要在正式開市前做個「心理調整」,預算一下組合內各成員開市後的價格,檢討一下自己各成員的質素、持貨比例。考慮應否作出改變,甚至「換包」。

祝大家好好運! 🙏

「體檢」自己的投資組合

前晚美股勁跌,港股明天「一劫」應無可避免。即星期一劫數難逃!(一笑)

通常在這種重要關頭,筆者都會思考一下自己倉內的每一隻組合成員,做足「心理調整」以應對。

筆者現時全倉持有9位成員。要考慮的,係自己是否滿意現時的倉位分佈? 還有最重要嘅係,在當前情況下,有否改進空間?

你今晚又會否「體檢」一下自己的投資組合呢?

祝大家好運!

晚安!^^

短炒需要狀態、時機和運氣

中午12点前留意到中芯(981.HK)股價在HK$17.40留下,它下星期一便會入恒指染藍,心想今日尾市應該多少都會炒上一浸。

1点要食午餐,...約1点30分食完,然後習慣漱口,然後飲水,然後埋位睇市,已經係1点40分。然後,擺在眼前的中芯就已經係HK$17.80, 掂算?

A. 照跟入,博佢升至HK$18? (冇肉食!)

B. 等佢向下跌返轉頭? (A股有向上勢態!)

C. 等佢肯定突破HK$18才再追? (唔怕被縛嗎?)

就係咁,又失了一個即日短炒的好機會。

的確,短炒很講狀態、時機和運氣。^^

後記二話:~

1. 剛收市。

我傻仔,我too simple, sometimes naive! 

981.HK競價收於HK$18.86,即較昨天勁升HK$1.40,服未?

一眾基金,包括盈富基金、港股強積金等等又要買「貴貨」了! ^^

2. Next Day(Saturday Morning)。

嗚呼哀哉!花旗國昨晚又出現「有股災感覺的調整」了! (應否算係股災,請讀者自行解讀。)

花旗國作為世界經濟的領頭羊,但過去十多年來,缺乏自省。整體金融政策就是「量化寬鬆」:推低利率、無節制地大量發債。又刻意把中國定為競爭對手,主動、頻繁地制裁中國企業和經濟。攪咁多嘢,結果係點?

結果係宜家帶比花旗人40年來未試過的「超級高通脹」!(CPI還未>10,所以我係暫時唔想形容為「超神級通脹」住, ...但遲D難講喇!)

中國遠洋 大海無「量」

中遠海控(前稱中國遠洋)(1919.HK)今日算係勁跌:7.68%!

雖然冇佢呀仔東方海外(316.HK)跌咁多:11.44%!

話係因為波羅的海指數跌至1個月低位。

但實際1919.HK或316.HK會係「賺少幾多」呢? 誰可告訴筆者? (先行謝過。)

我自己希望理性「量化」盈利或虧損的數字後,才去推算股價。

「超高股息」的投資組合

剛回一網友的支持留言,不期然自己又寫下「超高股息」這四隻字。

筆者較着重持股作長線投資,故很看重那些「預期」「有能力又捨得派息」的超高股息上市公司。 

筆者算係滿意自己今年的投資成績,以昨日計總倉值都係創緊自己的歷史新高,而以這個數字基數去計,筆者仍然預計在未來12個月這「組合年平均股息率」仍然很有機會做到10%pa。有這樣的預期,筆者又怎麼會擔心明天或有股災的來臨、股價下跌呢?...股價下跌,如果自己持股的公司生意冇逆轉(這個當然,所以我又很着重揀選「好公司」),預期仍可派超高股息,那麼計算這「組合年平均股息率」時,就「變相」有更高股息率。自己心態係「相對地」更放心持股收息。^^ 

大家有否計算過現時自己股票組合的「組合年平均股息率」呢? 

補充: 組合年平均股息率=所有組合成員一年總股息/組合「現時」總倉值 x 100% (保守計,我習慣不包括特別股息在內。)

今日換小小貨

出981.HK(清貨),入883.HK(增持)。

藍籌換藍籌。 中芯由於可成為藍籌,已升了兩個星期,還有幾日便可正式計入指數,筆者估唔到它未來幾日股價還會否再向上,今日見它A股逆市向下,而H股除非有較大成交和站穩HK$18樓上,才可挑戰HK$20,是後話。今日係說不定,故以HK$17.98出了。 

換入中海油:它後日便除凈@HK$1.18/share。除凈後,筆者睇圖表已守住3條平均線,除非再之後幾日都係向下走(都要配合國際油價向下走才合理啩),否則應似已係支持位。 

981.HK冇息,而且它已講咗下半年的生產成本會較上半年為高,即毛利率會跌。筆者當日買它係博佢入恒指,估大細,僥倖估中,現沽出冇息收股。但它始終有國策支持,係愛國股,貼市者或可嘗試短炒。

除凈後,約HK$11的883.HK,又會變番13.5%的「超高」股息率,到8月又再宣派中期股息,上半年超級賺大錢,應該今年中期息「唔止」派HK$0.30咁少了! 油和天然氣價仍在極高位,尤其最近天然氣期貨價升了好多好多。883.HK應該賺到笑了。 

今日靠晒1919.HK力保筆者組合總倉值正數。感恩。

科技股變身火箭股

很快、很明顯,今天3:30pm過後龍頭科技股一齊火箭式向上升。

700.HK在約3:40pm時,股價還是在HK$359上下,基本上和上日無變,但冇幾耐就變身神舟十四號。

雖然整日成交「未係非常多」,但觀乎這最後半個鐘的尾市交投,即連同收市競價交易,若明早大市還可以再穩定地上升,考慮埋上午若都有大成交額的話,筆者個人估計可能港股已「被轉勢」了。當然也要保險地講: 筆者現時未肯定。

你若自問係港股投資者,你之前已買夠貨了嗎? 還是會考慮於明天入多少貨? 還是等恒指再次落到二萬點附近才再次考慮呢?

Aeon大股東最近增加持股數目

悶股900.HK(Aeon Credit) 之日本大股東於5月27日以非自動對盤方式,以HK$5.20的價格入了4,950,000股,佔總發行股數1.19%,最新持股達到68.32%。

這股份還未除淨,有末期息@HK$0.22/share。

有人要賣,大股東認為價格「可以」,就成為交易。

繼續持有!它能月月賺錢,年年肯派高息,筆者冇有怕!^^

話時話,依家匯控徘徊於52蚊,你願意以HK$52咁上下的價格買400股005.HK,還是願意以HK$5.20咁上下的價格買4,000股900.HK呢?

持有一年的話,你有冇計過兩者的股息相差會係多少呢? 

利申: 筆者已持有900.HK超過五年了,... 唉! 其間曾多次增持,試過成為第一倉位,但也有減持過,現在排於第五位,...總之「未試過無貨在手」。^^

386.HK + 883.HK = Hedging

筆者目前都持有這兩隻股份。只計這兩隻,資金分配係883.HK較多(約70%,未除凈)。雖然386.HK也不少(約30%,已除凈)。

不要沈迷、過份挑剔這些百分比率,最緊要係自己感覺合適,晚上瞓得着覺。

Hedging! 係,筆者指嘅係「心態上」持有386.HK作為「對冲」883.HK。

自己想法係,如果油價轉勢向下走,883.HK/857股價會相對跌最多,386.HK雖然都會短線跟跌,但它下游業務其實會變得好起來,到時市場人士會「慢慢」提出這論調,386.HK就會較抗跌。然後,若油價可穩定在合適的價格內,它或可掉頭向上。

筆者會一直留意油價的變化,來決定兩者的分配比重。

當然,若油價一兩天內暴跌至US$40/桶留下(接近883.HK開採成本價),筆者無話可說,認命! 但油價如果繼續保持在高位徘徊,甚致再創新高,你會否FOMO呢?

總結都係嗰句:投資要量力而為! 盡量唔好借錢買股票,就唔會輸死。唔輸死,就有機會翻身!

最後想講: 人生幾時都應該要樂觀。除了錢,人生還有很多其他美好的事情、事物可以給我們做和欣賞,...可以的話,多做運動 + 鳥語花香, 都是免費的。^^

展望明天「估市」

現在係Sunday晚上,前晚Friday美股又跌,「正常」投資者應已預期明天恒指開盤會係跌! 至於稍後,筆者覺得就無謂亂估了,因祖國股市會很影響香港的中資股。

但國際油價早兩晚似係共升了約5%(無認真計過,只係憑記憶+心算),筆者「諗」+「或者」+「希望」3桶油明天可以避過一劫?...其實,...真係無謂亂估,以免影響今晚睡眠質素。

883.HK將於6月9日(星期四)除凈:@HK$1.18/share。7月15日會收錢。

利申:筆者持有386.HK和883.HK。希望寫本文時筆者冇感情用事!^^

「現時」的持倉組合

可能這個標題係你肯走入嚟睇嘅原因。^^

其實筆者一直已把自己的「真實」組合持股成員全部列於筆者的「個人檔案」內,但就未有公開每隻股票的持股數目或所佔的百份比。

一來筆者也算「經常」有做些個股的部份持股買賣,或stock switchings,如果要我經常保持update每隻成員的持股的數量,會幾嘥時間。況且也請容許筆者保留一些自己的財政私隱吧!

但確實,筆者若加入新成員,或已完全沽出某組合成員,筆者係會在當日(如果冇時間,會喺當日晚上)就update「個人檔案」入面之內容。

而寫這Blog的目的,是為了寫下自己對個別股份的睇法,和想留低現時自己的投資理念,給自己反省。

對於自己倉內的每隻股份,筆者應該會在日後有時間時逐一講講我自己的睇法和預期。^^

「股海心經」之來由

多年前從某本地報章的財經版上看到以「股海心經」為名的專欄,作者名為「諸政客」,似係筆名。

前輩對於選股和「中短期」的炒賣很有智慧,洞察力、推斷能力都很強,他每篇文章筆者閱後都有一些頓悟,雖然未有跟隨那些numbers做買賣。

因為筆者自己在當時的投資想法,都係希望以「中長線」「持股收息」為目的,自己性格、經驗和膽量都未夠班,短炒技術很差,再加上當年自己日間需要多些時間工作,睇市的時間少,就很難夠膽作短線炒賣。^^

的確,若日間需要全職工作的一般人,做股票投資後往往都會感覺幻得幻失,尤其銀碼相對比較大時,係很有壓力的。

STUDENT 自言自語

Hello Everybody! 大家好。^^

今天是筆者第一次寫自己的網誌文章。

筆者只係一個在香港學過會計的會計仔,用了七年時間在會計師行打工,雖然那些年的薪金不算多,但自己總算學到簿記、審計、公司秘書、處理公司和個人稅務的實際操作。脱離打工仔職涯後,在自己家居工作多年(有商業登記証,年年有報稅),...然後,隨著時間的流逝,clients的生意走下坡、一些又要移民、一些又要退休,我自己又對投資股票的興趣甚濃,...濃得化不開,...現今我主要的流動資產就是自己的股票組合,而主要的收入就是從投資這些香港股票上獲取。

活在當下,突然都想把自己一些膚淺的投資經驗和見解寫下,當係給自己做個記錄和自我反省,也非常歡迎各位有緣人在此Blog內留下高見,互相交流投資策略。

晚安,Good Night & Luck!^^