已微調「Student高息倉」內嘅比重

周生生(116.HK)星期一傍晚出大盈喜,令筆者喜出望外,遂決定加大佢在「Student高息倉」內嘅比重,經過星期二和三的兩日調動後(440→116),及今日佢哋股價嘅最新發展,以今天收市價去計算,440現約佔總倉值89.8%,116則約佔總倉值9.8%,還有,今日將套出嘅剩餘可投資金額,買入了1隻「現金牛」股(暫且稱呼佢為: C股),由於筆者仍然想在未來加碼投入C股(預期下個月將會收到440和116嘅中期股息),所以,暫時先不欲公開佢股票號碼,懇請諒解！🙏🤫😅

「Student高息倉」最新持貨佔比如下:~

阿大: 大新金融(440.HK) 89.8%

阿二: 周生生(116.HK) 9.8%

阿三: C股 0.4%

周生生 值廿蚊

以盈喜中位數計算,116.HK上半年每股持續經營盈利=HK$3.20,就當佢下半年只及上半年嘅一半,即HK$1.60,咁2026年全年每股便賺約HK$4.80,... 咁如佢股價升至HK$20,代表嘅市盈率都只係4.17倍！依然便宜！以「派息比率40%」去計算,全年股息便是HK$1.92/股,... 咁股價20蚊代表嘅「年股息率」便=9.6厘！依然係超高股息率！

利申: 筆者持有116.HK。

周生生(116.HK)再一次中期業績「盈喜」

市場可以幾盲目,但金子總會發光。💫

以「盈喜」中位數去計算,上半年每股持續經營業務盈利約為HK$3.20(2025: HK$1.35),筆者估計,116.HK股價短期內有條件破頂。🙏🤔

利申: 筆者持有116.HK,感恩！🙏😅

提高「派息比率」絕對是王道

今日中午時段,九龍倉置業(1997.HK)宣佈了將今年全年的派息比率(Dividend Payout Ratio)由2025年的65%提升至90%。下午一開市,1997.HK股價即有強勁反應！

116.HK/440.HK之2025年派息比率其實只得39%/40%,... 似乎,大有向上提升的空間呢！🙏🤔

利申: 筆者持有116.HK & 440.HK。

兩個超越的希望

純以基本財務數據指標作比較,筆者希望:~

1. 周生生(116.HK)股價可於短期內超越周大福(1929.HK)。

2. 大新金融(440.HK)股價可於短期內超越中銀香港(2388.HK)。

Student是否太貪心？😅

備註: 1929.HK和2388.HK都是藍籌股。

利申: 筆者持有116.HK和440.HK。

滙控(005.HK)出售360億澳元澳洲貸款組合予黑石

即滙控(005.HK)將業務和資源更集中在中港地區,反映佢愈來愈睇好中港銀行業嘅前景,... 絕對係好事一樁！

Student忽發奇想: 繼以PB1.8倍私有化恒生銀行後,滙控(005.HK)會有興趣收購其他本地銀行嗎？🤔... 唔知唔識！🤷🏻‍♂️

440.HK乃超級便宜之本地銀行金融股

截至31/12/2025,每股大新金融(440.HK)包括持有=3.2714股的大新銀行(2356.HK)和賬面凈價值約=HK$35/股 的「其他金融資產」。

執筆時,2356.HK股價約=HK$15,因此,每股440.HK單係持有嘅2356.HK已=HK$15x3.2714=HK$49,已大約等如440.HK現時嘅股價了！即那賬面凈價值=HK$35/股 的「其他金融資產」就是免費送給所有的440.HK股東們。

利益申報: 筆者持有大新金融(440.HK)。

大新孖寶母憑子貴

上午恒指看似變動不大,但查實個股表現各走極端,如網友是全天候留意住中港股市,相信會感受至深。🙏🙏

Student至關心的大新金融(440.HK)股價今早明顯地被佢阿仔大新銀行(2356.HK)帶起。🧐

本地銀行股股價已急升了三個交易日,包括中銀香港(2388.HK)、東亞(023.HK)和大新孖寶(2356.HK 及 440.HK)在內的股價已先後突破了52週頂位,而且,今早佢哋仍然肯逆市向上,... Student諗: 難道本地銀行股內有些好消息在醞釀中？🤔🤷🏻‍♂️

利益申報: 筆者持有大新金融(440.HK)。

滙控(005.HK)值HK$200？

摩通升滙控目標價至港元200蚊,假如5號仔能達標,筆者很想知,大新金融(440.HK)嘅股價,到時會係幾多呢？🤔

利申: 筆者持有440.HK。

9厘股息率之周生生(116.HK)實在便宜

佢上星期五收市後公佈了2026年4月1日至6月30日之第二季營業數據,基本上係持續穩健地增長,中國大陸、香港、澳門之各自同店銷售皆有錄得雙位數百分比正增長,整個集團之零售銷售值就按年同比上升了16%,另提及集團之整體營運效益已有所提升！

佢2025財年全年派息合共HK$1/股,執筆時佢股價為HK$11樓下,即往績「年股息率」已有足夠9厘,依家,Student對佢今年會增加派息已無懸念。

利申: 筆者持有周生生(116.HK)。

題外話: 此篇短文筆者係於今早開市後冇耐就已經出咗post,但不知為何,於網絡上直至下晝此刻4pm,筆者仍然未能看得到！😤