2022年股票投資總結

全年計,恒指由2021年底的23,398点跌了3,617点至昨天的19,781点,等於跌了15.46%。Student自己的股票投資總倉值,連同「應收未收的股息」和倉內「備用可投資現金」,就比起去年底時的總倉值下跌了2.054%。由於student全年都只是投資於港股,所以「Student高息倉」年尾与恒指作比較,自己就覺得最有參考價值了。

不過,Student的倉是經常把收到的股息再買入股票,而恒指就沒有計入藍籌股的股息,所以其實恒指的跌幅應該不致於15.46%,如以盈富基金(2800.HK)的2021年股息率3.36%pa計入,15.46%-3.36%,便=12.1%,即估計其實恒指計入藍籌股股息收入後,大約只是跌了12.1%。

不過,Student也不定時從股票倉內提取現金作日常生活費,Student也懶得去慢慢計返轉頭,就當是抵銷了恒指藍籌股的股息算罷!

自己最不滿意自己的投資表現是下半年,本來「Student高息倉」的總倉值於今年5月31日(當時恒指21,415点)是創出了歷史新高(Student有慣性記錄自己每個月底的資產淨值作分析),較去年底是升了10.87%,可惜之後倉內的兩支頭馬883.HK和1919.HK股價向下走,拖累了整個倉。

尤其不滿1919.HK,它今年公佈的半年業績宣派了首次中期股息@RMB2.01/股,但市場不賣賬,股價反應不大。當同業316.HK和1308.HK股價上升時,1919.HK總是跟不上。同業股價下跌時,1919.HK就跌得更快更多! 真是被它吹賬!

也罷! 過去了就是過去了。

當前,Student就最滿意自己的持貨組合和分佈,這点至關重要。如果投資者對自己現時的持貨已不滿意,又点會有信心/鬥心再戰明天/明年?

Student現時對自己和家人最有交代的,是「預期」未來一年的「全年股息總收入」。以此數字再除以昨天持貨總市值,得出「年平均股息率」為13.92%pa(2021年底時只是8.51%pa)。此兩組數字都是自己投資生涯以來的新高。

就是這兩組數字近年的不斷增長,給student信心經常都「全倉持股」。現時投資倉內的「可備用現金」只是總倉值的0.52%。(此數字還未計入398.HK的「應收未收股息」。至於113.HK的股息就要1月3日才被除淨,所以今天毋須理會。)

記錄數字,相當沈悶!🥱

Student打算明天或後天寫寫個人對目前「Student高息倉」(已記錄於「個人檔案」中)內每支成員的最新睇法。

Student於此祝各位網友 元旦愉快,身體健康! 🙏^^

Happy New Year! 🎊😃

暫別626.HK 加注398.HK

626.HK派息不理想,即使以除淨末期股息HK$0.11後的股價去計算,全年股息率都唔夠7厘! 佢始終只是一間小型銀行及財務公司,大幅加息對佢不利,所以好難期望佢2023年會有突出嘅表現,... 除了「唔知幾時」會有被私有化或者賣盤嘅可能。

早幾日已分析過626.HK,上星期又已沽走了五份之二。今早student再於競價時段開始「做嘢」,先沽出部份,再於開市後分兩次沽埋餘貨,暫別626.HK。將來有機會/把握 時才考慮買返,... 當然真係要「到時先決定」!

套現後買乜嘢呢? 就考慮今日自己持貨之中跌得最多嘅股份,... 原來係今日剛除淨嘅398.HK! 

上午已見到沽家積極出貨,... 真無厘頭,唔明佢哋点解昨天又唔沽!

下午見398.HK更被人以十幾萬股質落至HK$4.07,凄慘!... 於是... 之後... Student就膽粗粗以HK$4.09加佢注,... 做個對公司有貢獻嘅小股東。

Student樂觀地估計東方表行一定會受惠於中港兩地零售嘅復常,以股價HK$4.10去計算,估計佢全年股息率會>17%pa。

Student始終係貪高息!🤑

日誌: 迪生(113.HK)將於元旦假期後首個交易日(1月3日)便除淨中期股息@HK$0.08/股,所以明天(12月30日)上113.HK車的投資者都可以於1月20日收佢股息。👍^^

多謝大摩

今早於開市前嘅競價時段,見大摩掛出2萬幾股金朝陽(878.HK)@HK$6.60,但student又唔見aastocks內878.HK有任何特別新消息,於是就掛入6,500股@HK$6.60,... 最後成交了,開心!

開心係因為student之前合共3次買入了些金朝陽,但持貨股數很伶仃,3千5百股為尾數,唔好睇。今日買多6千5百股,就凑夠佢萬位尾數了,方便記住。

之前已分析過自己對金朝陽嘅睇法,希望佢大股東家族一朝覺醒,將佢私有化作為一個了結。

目標私有化價睇幾多?... 希望有廿五蚊啦! 🙏

日誌: 東方表行(398.HK)明天便除淨中期息+特別息,合共HK$0.313/股,下月18日便可收到錢,開心!^^

推敲大眾金融(626.HK)

626.HK明天將會宣派今年嘅第二次中期股息(其實係等於宣派末期股息)。

基本上student係唔寄予厚望,因為佢今年上半年嘅盈利已跌了21.5%,而香港下半年利率大幅上升,626.HK經營小銀行和借貸財務公司,斷估佢下半年嘅業務好難有驚喜了! 所以如果佢明天肯照舊派返去年嘅末期股息@HK$0.15/股,吾等小股東們就當是好消息了! 否則... 

至於佢明天會否透露私有化嘅消息?... Student就估計機會甚微,因為佢創辦人鄭拿督才剛於本月12日辭世,照計冇理由啲家族後人咁快就會攪此大動作啩?... 會惹人非議的!

因此結合上面兩個情況...

至於佢全年嘅實際盈利和年底嘅資產狀況,就通常要等到下個月大約15日~20日才會公佈。這方面於本地所有上市銀行股之中,626.HK算係最有效率的了! 抵讚! 👍^^

後記: 卒之公佈了末期息只有HK$0.11/股,即全年股息合共為HK$0.16/股,比去年係少了20%。Student之前對佢今次末期息嘅想法已有所警惕,故上星期已經以平均價HK$2.51沽走了五份之二嘅持股數量。宜家睇返,其實應該全數沽走先至啱,等今日公佈「預咗冇驚喜」嘅末期股息後,才慢慢以較低股價買回,就係最佳策略!... 唉,今次student始終係唔夠狠心呀!

加注517.HK

早排先買入嘅中遠海運國際(517.HK),「可惜」自己冇在「高位」約HK$2.7~2.8作出減持,宜家股價回返落HK$2.5樓下。既然倉內仲有可投資現金,今日就再添加佢多28,000股@HK$2.46~2.47,凑夠佢萬位尾數,方便記住,又可提高「Student高息倉」未來一年預期嘅總股息收入。

517.HK係「淨淨現金公司」,公司於過去3個月粗略動用了1.2億港元作股份回購,幾乎買了半億股!... 買得狠!抵讚! 👏^^

回購後,最新每股資產淨值便自動高了些,即使減去中期股息@HK$0.11/股後,肯定每股NAV仍然超過5蚊港元,當中包括「每股淨淨現金」略為超過3蚊港元。

由於student估計佢下半年「銀行利息收入」會開始有顯著增加,佢下次末期股息應該都可以做到中期股息嘅HK$0.11(其實會唔會唔止呢?),如是,全年股息將會係HK$0.22/股。以今日收市股價HK$2.45去計算,股息率便剛好是9厘了!

517.HK遲啲會唔會再作出回購?... 小弟唔知。

佢將來會唔會被中遠系私有化?... 小弟都唔知。

小弟只知佢於今年6月底時,持有淨淨現金約48億港元。(即此數字已減晒賬面上全部短、中、長期負債!) 👍^^

換馬 追數

昨天尾市時做了大額買賣: 沽走上星期才買入的939.HK和941.HK套現,然後即時盡量換入316.HK。

原先早兩日已有2,000股316.HK,宜家就持有佢x10倍以上,一躍成為「Student高息倉」內嘅第二位(第一位仍然係中海油)。

連同買賣嘅手續費,沽走939.HK和941.HK其實係虧蝕的交易,但student做股票投資是向前看,不會把過去式的持貨成本成為阻礙自己換馬嘅決策。

点解要咁做?... Student睇到BDI指數於過去幾個交易日於1500~1600点都似守得穩,又估計如果美股要有明顯反彈,好可能會与美國人聖誕和新年零售消費有關,咁航運需求自然會被憧憬一下。

之前已分享過個人睇法,估計316.HK下次末期股息會有HK$28/股(=US$3.6/股)以昨天下午股價約HK$142去計,除淨後便是HK$114。Student又估計佢明年全年嘅股息都會係HK$28/股(=US$3.6/股)(其實已保守得很了!),即是之後嘅預期股息率=HK$28/HK$114=24.5%,... 這股息率遠遠多過939.HK或941.HK,更唔洗被扣除10%大陸税!

昨晚美股上升,BDI又再有約8%升幅,國際油價又升了約2.7%,希望...

Student希望今次年尾前嘅換馬,可以稍為追回下半年嘅失地。

還有最重要嘅係,換馬後即時提高了「預期未來一年的總股息收入」,是創了一個歷史新高記錄。算係對自己和家人嘅一個交代。🙏^^

被摧殘的港股

今朝大市半日成交只有386億港元!

点解會咁樣?...

過份將其他市場嘅氛圍搬入嚟香港市場,結果只會造成本地股市東施效顰,欠缺自己嘅特式、節奏。

最後資金選擇只投機性停留係呢度,... 烏呼哀哉呀!

再+316.HK(2.0版)

今早大約11:15am又買多1,000股316.HK@HK$140.80。

依家共持有佢2,000股,平均成本係(HK$137.60+HK$140.80)/2=HK$139.20,... 未包括手續費。

点解買得咁急?... Student冇乜特別新消息,仍然只係依據自己嘅睇法(昨天短文已有詳細說明),既然投資户口仲有錢可買,就買自己有信心收息的。

大市古靈精怪,明明利率未見頂,但一眾科網股、本地地產股等等已大幅跑贏大市,內地房地產商仲係不停向市場抽水,... 但係啲「正路」、財務健康、年年派高息嘅藍籌股,例如316.HK,883.HK,939.HK,941.HK等,就完全冇表現! 咁樣嘅恒指萬九点,如果要再向上突破,難了! 如果大市「不幸」再向下尋底,我諗跌幅最多嘅應該都係之前升得急嗰啲!

小弟買股長線收息,首重考慮個股嘅基本因素,以目前手上資料,以316.HK股價HK$140去計算,小弟預計佢下次嘅末期息及明年(2023年)的全年股息大約可以「各自」派到HK$28/股,如是,收了下次末期息後,若股價HK$140不變,股息率都仍然有20%pa(HK140x20%=HK$28)。我自己認為這就是佢嘅最佳護城河!^^

P.S. 預期明午900.HK公佈季績,Student上星期四已出了短文交代自己對佢嘅睇法,... 就拭目以待。🙏

再+316.HK

上星期二沽清東方海外(316.HK)母企1919.HK時,內心已十五十六想換入316.HK,因為student考慮到316.HK於中遠系的唯一貢獻就是盡量派息給母企! 此外,316.HK並非國企股,收佢股息係唔會似1919.HK咁,要被扣減10%大陸税,student估計以現時嘅股價,316.HK嚟緊的末期股息率都仍然會高過1919.HK。所以純以收息角度作考慮,持有316.HK就較為着數。

還有另一方面嘅考慮,就係「話唔埋」1919.HK有朝一日會將316.HK私有化,即係買埋其餘股東現時共持股「唔夠3成」嘅發行股數,因為1919.HK似乎慣常鍾意買資產作「超長遠做大做強」嘅國策。如是,持有316.HK就有被私有化嘅可能了,反之持有1919.HK的小股東就只有眼光光睇住管理層「恣意購物」。

就係咁樣諗,Student頭先就入了1,000股316.HK(@HK$137.60),算係取代了上星期二沽走的20,000股1919.HK。

兜兜轉轉,卒之又再加番東方海外... 好玩呀!

回望之前連「最高股息率嘅藍籌股」都冇,又点可以叫做「Student高息倉」呢? 😁

跟隨已敗壞的金融制度揾食,那會有好結果?

香港本地通脹率仍然低於2%,点解銀行要跟隨美元加利率?

美國仲要加多幾多厘息先至可以將佢哋嘅通脹率撳低至目標嘅2%? 香港点算?

長期咁樣玩落去,本地股、樓那會有前途?

点樣破局?

Aeon Credit: 季季賺錢錢

肯每季都公佈業績的「本地公司」真係少之又少,大家較熟悉的相信會包括有中電(002.HK),匯控(005.HK),... 其他呢?

Aeon(900.HK)就係其中一隻,而且佢過去每季公佈的業績都是有盈利,這点中電和匯控過去都做不到。

Aeon將於下星期三(估計會於中午時段)公佈2022/23年度嘅第三季業績,即1Sep~30Nov2022。由於去年同期之盈利數字比較低,故Student估計佢今年單計第三季之盈利很有可能會比去年同期增加超過兩成以上,即>20%。如是,Aeon今個財政年度「頭9個月」的盈利會有接近1成嘅增長。於今年咁嘅環境之下,都算係有交代了!

Student最喜歡佢一向穩打穩札的作風,專注本業。可能由於佢全部管理層嘅成員都只係日本母企(Aeon Inc.)委任嘅「打工仔」,唔敢用公司嘅錢攪三攪四,或攞去做投資。

Student觀察到佢過去幾年,每季平均都大約可賺8、9千萬港元盈利,即平均每股可以賺到兩毫子,以一年計,每股便賺到8毫子了。而從中分派每股HK$0.44作為股息,就等於55%嘅股利分配率。

Student認為呢個Dividend Payout Ratio對於咁有實力嘅Aeon嚟講算係「好保守」了,大有提升嘅空間呀!🙏

金朝陽(878.HK)大變身

近排本地地產股被掃高,其實幾冇厘頭,因為美國嘅通脹距離目標通脹兩厘尚遠,估計「未有耐」可以停止加息,咁樓價又点會突然轉勢?

當中冷門股金朝陽(878.HK)股價也有些升幅,但筆者純綷從公司的基本因素作考慮,佢似乎係「好有憧憬」!

因為878.HK於8月時公佈以約32億港元出售了希雲大廈,估計入賬盈利大約為5.98億港元(來自該舊樓的年租金只有1453萬元),即每股從中可以賺到HK$2.11。

套現的錢,再加埋公司於6月30日時嘅「銀行存款+現金」,再減去6月30日時嘅總負債(流動負債+非流動負債),都仍然有淨淨現金約15億元(=約每股HK$5.30),即係變身成為「淨淨現金公司」。

不過,由於目前交易尚未完全完成,8月只收了10%款項,半年後(即明年2月)會再收多10%。筆者估計佢收埋第二次10%後,最終會完成交易嘅機會就相當高了。況且收了6億多現金,即使買家之後反悔,金朝陽沒收這6億多(=每股賺2蚊有多)入賬,已經很「和味」了！

Student估計878.HK明年完成了此宗大交易後,佢可能會派特別股息,然後市場又可以炒佢會被大股東私有化,畢竟現時大股東已經持有公司74.29%股份,已冇乜空間比大股東再從股票市場上增持。

於6月30日,佢賬面每股NAV=HK$68.87,若加埋從出售希雲大廈中所獲盈利,即最新每股NAV大約=HK$71。昨日收市價係HK$6.70,即是依家PB連10%都冇!

當然,PB夠低唔代表係好股,但金朝陽將會變身成為「淨淨現金公司」,就係極利好嘅消息了。

「似乎」好值博!🤔

大眾鄭鴻標前日辭世 626.HK會被賣盤嗎?

Student冇內幕消息,所以真係唔知。

不過如果真係「有朝一日」成為事實,Student估計626.HK的每股交易作價會比昨日佢嘅收市價可以高出6成,即「坐底」HK$3.80! 🙏^^

-1919.HK +941.HK

今次Student真係對海控(1919.HK)很失望。佢昨夜公佈話以24.4億人仔向母企收購3棟寫字樓物業,連埋早排以約206億人仔訂造12艘船舶,及以約190億人仔向母企收購上港及廣州港,很短時間已製造資本支出合共約RMB420億!

Student認為佢買得「過份爽快」,而且比筆者印象係: 佢似乎要將公司啲錢「孝敬」媽咪。

今早開市冇耐,見同業316.HK和1308.HK都有明顯升幅,心想1919.HK点都會有些反應啩?... 但事与願違,海控股價最高都只係HK$8.34,完全跟不上阿仔316.HK,莫講話跟到1308.HK。

明天海控A股會除淨中期股息RMB2.01(H股就早排已除淨了),Student不知明天A股股價走勢如何,都係嗰句: 君子不立危牆之下...

所以,Student上午唯有「忍痛」(哀莫大於心死)以HK$8.26沽出剩餘嘅海控股數。(早排已沽走大部份,當日換晒入883.HK)

然後換甚麼好呢?... 本來想換316.HK,話晒都係同業,又超高股息,但係佢股價已被掃高至HK$140樓上,Student考慮了一會,都係唔想追了,下午就決定以HK$51.25買入小量大家都很熟悉的941.HK,當係「換馬」。

点解揀941.HK?... 大家都睇到762.HK和728.HK最近都已被炒上了很多,破晒52週高位,但941.HK就明顯跟唔到,宜家買佢就博市場會揾佢嚟追落後! 咁就算佢向下走,似乎HK$50(50天線)已係超強支撐位。如果佢股價真係再見返50蚊,相信大市也有一些調整,到時再考慮應否止蝕或者換馬。

做定期: 939.HK

大約一年半前Student都有內銀股,當時由於聽到有大型民企內房股開始有「出事」消息,心想即使四大內銀唔會執笠,但... 君子不立危牆之下,當時就決定走晒啲內銀先。

今天局勢有變化,中央話到明要救房地產,而民企內房股價又已被炒炒下「上返唔少」,Student宜家買返內銀股就相對安心很多了,尤其是內銀整體截至9月底嘅業績都仲有正增長。

Student下午以平均價HK$4.695入了兩大注939.HK,即時進駐「Student高息倉」內第二位,心態係等於做銀行定期存款,估計現股價係起碼有大約8厘股息率(已扣除10%祖国税)。睇返轉頭,原來佢現價比起自己當初沽走佢嘅股價低了足足HK$1.5,雖然其間少收了兩年末期股息,但都算係除笨有精!

点解揀939.HK?... 大路囉! 而且目前四大內銀A/H股價之價差,佢係相對有最大嘅折讓,... 小小不尋常! 👍^^

聖誕及新年股: 113.HK + 398.HK

恒指本星期共升了6.56%,筆者收息倉就慘了,完全跟不上。最主要係「阿一」883.HK全週跌了1.5%,雖然「阿二」900.HK升了2.73%和「阿三」113.HK升了2.3%,但整體跑輸晒係事實。

今早全面檢視一下所有持貨,發覺原來倉內的兩隻「淨淨現金」零售股已由早排嘅最低位上升了不少: 113.HK(迪生)升了27.88%,而398.HK(東方表行)更升了36%!

當然,佢哋比起最近熱炒的所謂「名牌股」冇咁有知名度,例如178.HK(莎莎):由最低位升了剛好100%!或709.HK(佐丹奴):升了32.5%,但筆者覺得自己以長線收股息 和 企業財務狀況來作考慮,以土生土長嘅零售股中,迪生和東方表行就仍然係筆者的首選。

迪生今次半年純利已有1.55億元(即每股賺HK$0.394),但佢去年全年只賺2.01億元,如無不可預期的經濟情況,筆者「保守預期」佢今年全年起碼可賺返3億元以上,即係有>50%的盈利增長,尤其係最近的存款利率及股債都有明顯上升,迪生的巨額淨現金(約HK$20.2億)和股債投資(約HK$18.5億)都應該非常受惠。佢以後會否增派股息呢?... 筆者唔知道,但冇人可以排除迪生會「隨時派」特別股息嘅可能性,即使每股派1、2蚊,都只係消耗存款4億、8億咁大把(註釋:大把,即很多),係綽綽有餘! 佢截至30/9/2022,每股資產淨值(NAV)係HK$8.398。(下月3日佢將會除淨中期息@HK$0.08/股)

至於398.HK(東方表行),雖然佢每股NAV唔算高(30/9/2022: HK$3.86),但佢最優点係肯「派晒盈利」作股息,佢半年盈利略為下跌9.2%,但筆者估計佢下半年(鐘錶業)會受惠於市道復常(113.HK都係),估計佢可以賺到去年下半年的盈利,即下次每股末期息(連同特別股息)都可以派返大約HK$0.405/股。(398.HK將於本月29日除淨中期息+特別股息, @HK$0.313/股)

總結: 

兩者皆是「淨淨現金公司」(即「銀行和現金結餘」已可以足夠減晒「公司所有流動和長期負債」) 及過去「年年賺錢」兼「派高股息」嘅優質中港台零售股。

從上半年業績中分析,113.HK的業務包括銷售腕錶及珠寶首飾(約佔50%)、化粧及美容產品(約佔25%)、時裝及配飾(約佔25%),算係幾多元化! 另外,再附以策略較保守的股債投資(這点student從佢以往多年的業績中可以睇得出)。零售銷售市場方面,以銷售額高低作排序,就包括了港、台、中。

至於398.HK,佢主要經銷及零售手錶、時鐘、筆及打火機,銷售市場就包括中、港、澳(澳門)。

筆者考慮再增持佢哋,尤其係113.HK,但佢慣常成交量不多,較難以便宜價位入貨。(希望聖誕前可完成)

398.HK就可能會等佢除淨完中期息後,即每股NAV跌至HK$3.55,希望4蚊留下可以增持。(希望農曆新年前可完成)

股海自由港(12月9日晚上標題)

「港」与「講」皆為同音字。

標題之「港」指香港,然而字音雙關,Student欲暗喻自由「講」,即香港人言論自由也。

隨便留言,依然Free Talk!^^

充斥着投機的股市

碧桂園1個月內重覆向市場抽水,而且都係只能夠以上日收市價有差不多15%之折讓價格才能「成功說服」市場去接貨,其實真係「好肉酸」呀! 可想而知高負債的大陸民企房地產公司仍然係吊緊鹽水。不過市場參与者總會找到借口說服市場資金去投機嘅!

唔理好醜,最緊要就手? 🤔

剛聽到香港今日「新感染」嘅確診數字「突破一萬宗」,... 可以講病毒已無處不在,而且「撳不住」了, 宜家內地又... 🙏

後記: 

(12月8日星期四,已收市)

今日對筆者而言算係小小小股災,因為估唔到國際油價昨夜於歐美交易時段又再「玩嘢」,連續幾個交易日都係咁樣: 香港日間時間油價期貨「好地地」,但係我哋瞓醒覺後D價格就「反晒艇」! 😤 大家都知Student有中海油和中石油,前者更加係「Student高息倉」內嘅「阿一」,所以「講真」,今朝早開市前student真係有啲緊張,心想今日都唔知會「賬面虧蝕」幾多錢? ... 於競價時段Student見價位可以,即掛沽出3成股數,再見開市後股價仍算合適,就二話不說再沽多2成股數,...於是總共就沽出了一半嘅883.HK持貨了,平均價係HK$9.848,即刻心態便放鬆很多了!

再之後就考慮857.HK的去留: 由於Student預計佢今年PE和Dividend Yield都輸比883.HK,既然自己「睇不清」油價走勢,而且Student早排係佢於HK$3.05時入貨,數目又唔算好多,心想就唔再花精神睇佢了,... 就以HK$3.49沽走了事。

於是,倉內依家剩返只有「九兄弟」,而883.HK就仍然係「阿一」! (大家可想而知student今早開市前嘅精神壓力有幾大!)... 好彩收市後計一計,總倉值(包括可備用現金)都只係比昨日少了0.604%(而恒指就升了3.377%!),哈哈...

套現後想買乜?... 因明早要陪診,Student想先冷靜一下。🙏^^

超高息收息股可以轉強嗎?

398.HK ?

預計全年實收股息

=$0.313+$0.405

=$0.718

883.HK ?

預計全年實收股息

=($0.70+$1.00)x90% (已扣減10%大陸税)

=$1.53

点唱: 許冠傑〈世事如棋〉

後記: (12月7日(星期三)早上記錄)

筆者冇預計國際油價於過去短短兩個交易日,便由上星期五的最高位計,布油約US$88,跌足10%! 現在布倫特油價大約企於US$79.50,... 冇「計」了,唯有自安自慰,中海油的每桶採油成本連同作業費都只係大約US$41,即毛利率仍然係超高。以當前每桶油價約US$80去計算,佢仍然會有非常可觀利潤,而Student依然係...「貪高息」! 剛睇下aastocks.com,佢又有新項目投產: 位於南海嘅恩平油田群,包括兩座鑽採生產平台及一座無人井口平台,是中國海上油田無人化、少人化、智能化的重要突破。

筆者相信中海油下半年開始的大量新投產項目,都會長遠對公司有盈利貢獻,... 除非油價於目前水平再有顯著下跌,那就始料不及了。

另外,筆者觀察過去「很少」出現857.HK的股價是低過386.HK的股價「超過」兩毫子(HK$0.20),...

海油今早明顯跑輸大市

OPEC+已開完會,強調維持每日減產200萬桶石油的決定是完全出於市場考慮,意思明顯係如果油價再跌,佢哋可以再減產。

這一刻紐油及布油期貨價格比起上星期收市價係上升了約1%。

今早恒指升了3.5%,上証綜合指數升了1.56%,而中海油A股(600938.SH)就升了2.57,但我嘅883.HK雖貴為藍籌股,但就只係升了0.7%,完全跑輸大市!

冇計! 股市就是這樣,Student都要學識專重市場!🙏^^

点唱: 陳百強〈等〉🎧🎶

恒指公司「攪風攪雨」

Student昨天真係大懵了! 收市後睇下aastocks.com先至醒覺嚟緊星期一(12月5日)便是恒指、國指加入新成員嘅大日子,唔怪得下午1点半開始,857.HK由最低位HK$3.43,一路向上爬至HK$3.55,收市競價時段更被「刻意搶高」,因為佢都會被納入國指,咁指數基金當然要做番啲調配,... 咁昨天當然會對另外那兩桶油(386.HK和883.HK)有影響,尤其係依家市場資金都未算係好充裕嘅時候。

Student覺得用「亂曬龍」(即係「七國咁亂」)來形容昨天競價時段那幾分鐘的價格波幅就很貼切了。

Student says: 呀恒指公司(全名係「恒生指數有限公司」),呢啲係你「一手」攪出嚟嘅! 你冇得抵賴! 🤛😤

利益申報: 筆者目前持有857.HK和883.HK。

先減1919.HK,後加883.HK

10:45am前賣出了大部份1919.HK@HK$8.05。

11:35am前將上面套現所得,盡量買入883.HK@HK$10.02。

為何筆者作出以上動作呢?... 

幾個月前筆者開始「落重注」1919.HK作投資目標,有很大程度是因為佢比起當時嘅316.HK和1308.HK相對落後很多。加上筆者當時預期佢將會變做「淨淨現金公司」及開始派中期股息。之後佢真係做到了。但往後股價嘅表現,大家有目共睹(市升時跟唔上316.HK和1308.HK,佢哋跌時1919.HK就跟到足兼有突)... 而且佢A股嘅表現都係乏善可陳。截至今日中午,中遠海控之A/H股「價差」只是約30%(留意:今日A股價未除淨中期息RMB2.01,筆者作出計算時已將A股嘅股價做咗調整),而中海油之A/H股「價差」依家中午就約等於45%。

至於股息考慮方面,過去的係冇意義。筆者估計1919.HK下次末期股息約為RMB1/股(這個可能又要出另一篇文作解釋),扣除10%大陸稅後,再以目前匯率換回港元,就當係末期息實收HK$1/股。至於883.HK,筆者已多次估計佢下次末期股息為HK$1/股(請番看筆者早排有關883.HK之短文),扣除10%後,便是HK$0.9/股。

還有很重要的考慮係1919.HK与一眾同業都在面對貨櫃航運費近幾個月的大幅調整,幾乎所有「專家」都認為未來兩、三年(2023~2025)佢哋都會「冇運行」,Student雖未至於估1919.HK會營運至虧蝕,但觀乎歐美近排嘅實質經濟情況(我反而對中國未來經濟有較大信心),而貨櫃航運又与歐美經濟息息相關... Student唯有作出自己認為較安心嘅決定: 出了大部份1919.HK,只保留小量作觀察/紀念。

套現所得,就加碼落883.HK,因為唔想「每年總股息收入」於今次賣走大部份海控而有顯著下跌,而中海油始終是一隻盈利和股息率都較容易掌握的「超高息+超大型」國企股。🙏^^

中海油(883.HK)🇨🇳有資格追落後

中海油(883.HK)實牙實齒做實事: 包括著力抓好海內外油氣勘探和增產工作,大力實施提質增效升級行動,持續發展科技創新強基工程,推進綠色發展跨越工程,又利用海上優勢,繼續加快風力發電,節省成本。

雖然佢於9月底之「銀行存款及現金」已創了新高記錄,但係佢稍早時只於H股股價10蚊或留下時才作出積極嘅股份回購行動,冇喊話要去高追股價,於此佢係抵讚嘅!👍^^

最近市場傳聞話佢將會變賣「不友善國」嘅油氣資產套現,因而有可能錄得額外盈利,... 值得加讚!👍^^

今天已是12月1日,以目前整體香港嘅藍籌股計算,Student預測今年(即2022年)全年擁有「最低市盈率及最高股息率」嘅股份,883.HK應該會排於第二位。(第一位應為316.HK東方海外。)

今輪港股爆上,截至今天收市價去計算,883.HK真係屬於大幅落後於大市了!  😫

Student says: 小弟對佢最近嘅股價表現也有些失望,但對佢今年公佈嘅所有發展消息和業績都很滿意,基本上係無可挑剔了,因此小弟目前仍然會對883.HK不離不棄。🙏^^