強美元下之受益國企股

今早有大藍籌股因為磅匯大跌,例如001.HK,005.HK,..而有較大跌幅。(奇怪,乜唔係話加息之下,匯控會愈來愈賺錢嗎?)

有黑就有白! Student就發現(其實係發現咗好耐了!)組合內的兩支巨型國企,由於有美元收入,強美元反而造就了今年會有顯著嘅「匯兑收益」。

883.HK: 佢今年上半年的財報表內之「綜合收益表」顯示「匯兑折算差異」獲利RMB100.16億元,所以佢上半年之「稅後綜合收益」歸屬於股東的數額實為RMB830.49,而並非只是很多人以為嘅盈利RMB719億元。

1919.HK: 同樣地,佢今年上半年的財報表內之「中期綜合收益表」顯示「匯兑差額」共獲利RMB38.84億元,因此佢上半年之稅後「綜合收益」歸屬於股東的數額實為RMB673.20億元,而並非只是很多人以為嘅盈利RMB647億元。

網友如有興趣,不妨check下今年上半年美元兑人仔升了幾多%?

又再check下6月30日後,直到今日(9月26日)又再升了幾多%?

計完後,你就「非常粗略」地估計到下半年7月1日至今天9月26日上述兩間公司的「匯兑收益」再增加了幾多。(答案都幾誇張!)

留意:「綜合收益表」內除了「匯兑差額」,也有包含其他項目的收益和虧損。上面兩間巨企的匯兑收益就明顯地佔綜合收益內非常高的數額了。

預測Aeon(900.HK)之中期業績

3、4年前,Aeon曾是筆者股票倉內之頭馬,即是以當時市價計,它是佔有最大金額的倉值,宜家就排於第三位。

佢明天將會公佈半年業績(3~8月),若然如同往年一樣,中午12点過後,公司便會發出業績通告。

佢上次公佈之首季(3~5月)盈利為0.8266億元,下跌了14.7%。雙位數跌幅,看似不理想,...但身為小股東的Student就很「收貨」了!

早排Student於本Blog內曾經提過,今年本港之零售銷售最差之月份應該算是2~4月(尤見是3月),即係已包括於Aeon首季的業績內,相信6~8月的零售數字已按季上升不少,而消費券又已於8月份開始,多少都有帶動整體零售氣氛,也會帶動信用卡之生意。

當然,外人最難估計Aeon的貸款壞賬撥備,但佢在香港已做了多年業務,可謂經驗豐富,絕對係信用卡及貸款市場嘅「專家」,相信這方面佢哋會控制得好好。

由於Aeon去年6~8月之盈利只係0.75億元,基數相對較低,所以Student大膽預計佢明日公佈之半年盈利只係較去年盈利跌0~5%!... 其實,可能係「升」都唔出奇。

我預計佢中期息就每股派HK$0.22~0.25。(去年中期息為每股HK$0.22。)

... 吓? 咁樂觀?

Student says: 做人又好,做投資又好,稍為樂觀係冇壞嘅! Good luck everybody! ^^

後記: 

揭盅了,居然盈利真係有得升!... 2.6%雖然唔算多,但肯定一眾股東們都應該收貨了。可惜中期股息只是照舊派發每股HK$0.22,... Anyway,佢股價於下午復市後都稍為逆市上升,抵讚!👍^^

放走316.HK

今早市況又係兇險!

昨日最新的BDI只是稍為下跌約1%至1720,仍站於9月高位附近,1700樓上,与上月底之全年最低位965点,仍有78%之升幅。

不過,今早之航運股就愈睇愈「牙煙」。

316.HK股價開頭算係最好的了,部分時間企於HK$148樓上,Student見到咁樣,希望佢可以帶起佢媽咪1919.HK之股價,可惜隨着其它一眾航運股都顯著向下走,316.HK也頂唔順了。

11点前,Student見1919.HK跌得太快太急,反而316.HK還可以掛頭牌$146.90(即係=昨日之收市價),於是便掛出唯一的一手316.HK,之後便成交了,但... 今次係蝕水交易呀!😭

換馬:

3大油股和3大電訊股今早都似「避難所」。

941.HK之A股今早居然可以有>4%升幅,想起網友「金戈鐵馬」兄近排大力推薦,Student也自覺持貨不足,於是就把316.HK的套現換入了1,500股941.HK@$51.80。

現時持有之941.HK共11,500股。

至於1919.HK,母企於7月底時公開話過會再增持佢,而目前1919.HK係現金最滿瀉之航運股,Student希望佢也考慮自己出手作回購。還有,佢未除淨中期股息@RMB2.01/股。

後記: 

1. 9月23日(星期五晚)的BDI再由9月22日的1720点「上升」96点至1816点,即是單日升了5.58%。

2. 至於星期五晚國際油價就「下跌」了4~5%,原因話係因為經濟衰退喎!... 但其實係邊個國家先?

全球將會加速去美元化

佢唔洗儲錢,一味印銀紙,唔夠用就向全世界嘅信徒寫借據攞錢。

佢唔洗理你哋嘅貨幣匯價跌成点,通脹變成点,佢會話關佢乜事。

佢唔洗理你哋金融市場幾咁混亂,股市跌成点,佢一切嘅金融政策都只係考慮佢自己嘅利益。

佢好多個月前話佢會控制到油價,話佢會控制到通脹,又話佢哋最偉大......

Student想知,全世界都比佢攪到唔掂嘅時候,佢還可以掂嗎? 🤔

突然想起有句說話叫做:「物極必反」。🙏^^

預期美國今晚加息一厘

不要怕!

加一厘,一啲都唔多!

根本就係美國加息行動太遲鈍了!

根本一開始決定加息,佢就應該每次決議都要加足一厘,才有啲說服力,才有啲震懾力!

今晚加一厘,可以令到市場人士演譯為下次議息或者可以加少1/4厘,... 咁咪幾好!... 美國金融施政一慣手法就係:「捉心理」!

大家明白乎?

Student目前仍然係全倉持股收息,倉內現金只有港元萬零蚊,... 不知網友依家手上有甚麼股票呢?... 會對息口敏感嗎?... 又有很多現金嗎?... 🙏^^

後記:

1. 晚上探訪aastocks,又發現883.HK今日再出手回購,今次965,000股@HK$9.98~10.00,應該係今朝9:44am前便做妥,因為之後股價都未有再見過10蚊了。

2. 美國議息結果卒之出來了,今次「只係」加息0.75厘,小弟「估錯」了!慚愧! 🥴

雖然市場大多數都「估對」加息結果,但就演譯為下次11月議息會再加0.75厘,而之後還要再加,... 結果杜指就由升轉跌500多点,納指就由升轉跌200多点。求仁得仁,又何怨乎? 🙏

上市公司「回購」行動

市況低迷,經濟前景不明朗的情況下,那些「股價」相對「每股資產淨值」有極高折讓,負債比率又極低,處於「淨現金」狀態,甚至是「淨淨現金」狀態的上市公司,其實真係好應該考慮用「回購股份」來提升每股資產淨值,回饋全體股東。

昨日517.HK逆市上升,今早Student才發現原來佢昨日回購了2,300,000股@$2.10~2.15區間。此股平日交投相當淡靜,股價今早直至現在仍然「有反應」,似乎都是因為這個回購行動。

簡單直接,容易計數,而效果通常都會是「良好」。

883.HK最近一個星期也於股價$10或以下積極地回購H股。佢H股股價「便宜」過A股幾乎一半,回購H股就是相當明智了。

Student以往一直都很贊成本地「財政健康」的上市地產公司作回購行動,可惜大多數都沒有這麼做,一味只識高價搶地,買貴價麵粉!... 只想做大地主?... 恒基兩番貴價買中環地,希慎貴價買銅鑼灣地,...宜家很滿足了嗎?... 回報率預計會可觀嗎?

大股東要思考: 上市目的為何?

小股東要思考: 為何投資於它?

滯脹

昨晚世銀警告,全球將陷「滯脹」! 即係全球經濟停滯不前,高通貨膨脹揮之不去。

如何解決這問題?... 可能真是需要「去美元化」,否則多國貨幣跟隨美元不停加息,世界經濟衰退就很難避免了。

昨晚油價雖然回調,但其實一啲都唔便宜。紐油現時約USD85,布倫特原油現時約USD91。採油巨企仍然係每日都忙於數銀紙!

天然氣價都是於「極高價位」大上大落。

波羅的海指數(BDI)昨天再升17点至1612,已是連升7日了,... 似乎已確認不會重返今年之最低位,即965了,不過人心始終仍然係虛怯。

週期商品股否極泰來?

筆者算係重注的高息商品股,包括883.HK,1919.K+316.HK。

過去兩三個月,佢哋跟着大市走,甚至因為被評為環球經濟衰退的先行者而被率先睇低,所以「無運行」。

中秋節假期後,國際油價、天然氣價都繼續徐徐上升。至於波羅的海指數(BDI),昨日又升了13.28%至1,595点,不經不覺已由8月31日之最低位向上升了約65%。

Student相信「極度便宜」的週期商品股股價已經見了底,希望慢慢可以「否極泰來」。

883.HK連續兩天只在10蚊位置回購,未有於股價>10蚊買貨,似乎懂得節制,「暫時」抵讚! 👍^^

米國信得過 豬乸可上樹

決策者後知後覺,話事人好大喜功。

人無信不立,國無信不興。

題外話:

1. 昨天883.HK以接近每股10蚊的價格大手回購H股共1493萬股,是今年的第一次回購。

2. 昨天BDI(波羅的海指數)升了152点至1408点,即單日上升12.1%,升幅為7個月以來最大。

3. Student很想買多些941.HK,但暫時投資户口內缺水,而已除淨咗之5隻持股股息又尚未到手。有些無奈,但都要接受,也慶幸於佢除淨前已入了1萬股。

飲水思源

雖然呢度有不少筆者唔欣賞嘅制度,例如加入恒指成份股的準則,但呢度始終係筆者熟悉嘅市場,有熟悉嘅文化,所以較容易去理解和作出取捨嘅決定。

經常持有「肯派股息」的股份,選擇性地揀「相對」更便宜、更肯派高股息,甚至派超高股息的作組合倉內成員。

飲水思源,身為中國人,Student開心地做個樂觀的港股長線投資者。^^