周生生(116.HK)仍在市場重估中

留意到佢今日股價,似乎擺脫了過去一星期慣常跟著周大福(1929.HK)或六福(590.HK)的股價走向。

筆者是於今年5月中時才開始建佢倉,當時眼見金價愈升愈有,除了金礦股,其它具規模的中港金飾股股價也愈升愈高,唯獨是作風低調的周生生股價就斯人獨憔悴！

其實,周生生的市賬率(PB)一向最便宜,而且,近排似乎還未有大行出報告提示市場參與者,周生生持有的332.68萬股 港交所(388.HK)股票,股價今年已大幅升值！

雖則此筆「浮盈」一向被周生生歸類去「其他全面收益」內,而不計入持續經營利潤中,但畢竟最後都會在公司盤數內反映的,結果就是提高每股資產淨值！

2025年上半年,周生生每股已賺了HK$1.34,當佢下半年盈利模式跟足2024年同期,即盈利只及上半年的一半,咁估計佢2025年全年也能賺到HK$2/股,咁即使股價升至HK$20,講緊嘅市盈率(PE)都只係10倍,仍然便宜過周大福(1929.HK)或六福(590.HK),莫講話要跟周六福(6168.HK)或老鋪黃金(6181.HK)作比較了！... 何況,以目前嘅金價走勢,佢下半年嘅盈利,真的只及上半年嘅一半... 咁少嗎？🤔

沽貨換家傭

由於屋企舊印傭要在今年底前返去印尼與家人團聚,所以需要聘用新家傭。

於是,上星期六,家人和筆者就睇下中介網頁,尋找合眼緣的即將完約本地印傭,翌日,視像面試了幾位,從中揀了一位性格表現較為開朗的,再約佢於嚟緊嘅星期日到中介公司鋪頭面見、再瞭解、和決定簽約與否。

就係咁,筆者需要做一筆36萬港元的定期存款,作為符合其中一項聘請外傭的資產條件。

由於筆者近年採取全倉持股策略,因此,除非是在收到股息而又未及全數再投入買股的日子,筆者經常都只持有足夠應付日常生活開支的銀行活期存款,而沒有定期存款。

所以,為了要做一筆36萬的定存,筆者就要選擇沽些貨仔了！咁啱今日下午,見到有人掛牌求入5千股國浩(053.HK)@HK$75.50,筆者考慮到金額合適,便依依不捨地沽出此數量予此有緣人。

為何不捨得？... 因053.HK應將於本月底前公佈業績,而筆者算係對佢有信心的,... 不過算罷啦,自己嘅入貨成本係早排62~67蚊區間,何況現時還是有貨在手的,... 或許,等到9月18日,筆者收了阿大440.HK股息後,若其時053.HK價位與現在差不多,甚至更便宜,唔排除到時再增持番佢！

畫虎畫皮難畫骨...

... 知股知值不知心！😤

估唔到116.HK半年持續經營業務盈利=HK$1.35/股👍、半年全面收益/盈利總額=HK$2.36/股👍、每股資產淨值於30/6/2025升至=HK$20.50/股(31/12/2024: HK$18.50/股)👍,但,管理層居然議決只派中期息=HK$0.21/股(2024: HK$0.15/股)！👎

唉,洗唔洗咁孤寒呀？😤

那支是最便宜的珠寶金飾零售股？

答案是出咗「盈喜」的周生生(116.HK)。

周生生將於明日公佈截至30/6/2025之上半年業績及中期息,以「盈喜」通告盈利中位數HK$9.1億元,除以總發行普通股數6.71712億股,便得出周生生半年每股營運盈利已=HK$1.35/股。

而且,此數字並未包括它持有的332.68萬股 港交所(388.HK)股票 在這半年內 股價由HK$294.80升至HK$418.80所產生的「浮盈」HK$4.125億元(或每股賺HK$0.614),此「浮盈」習慣被周生生列入於「其他全面收益」內。

筆者樂觀地亂估: 周生生於30/6/2025之「每股資產淨值」已升破20蚊港元,今年全財年的「每股除稅後盈利」起碼HK$2以上(不包括佢持有的388.HK股票股價升值),而今次中期息可能=HK$0.3~0.4/股(2024年: HK$0.15/股),以HK$0.4/股 去計算,其實所涉及嘅數額都唔夠HK$2.7億元呢！🤔

「Student高息倉」最新排位🧘‍♂️

阿大: 大新金融(440.HK)

阿二: 周生生(116.HK)

阿三: 國浩(053.HK)

......

(只顯示頭三隻長線倉位。🙏)

已沽出857.HK

平手蝕手續費算數了,冇計！套現,因形勢比小弟強！小弟需要冷靜一下。

「Student高息倉」暫時只持有440.HK和113.HK。小弟現時反而對佢哋較有信心,這兩日見到440.HK有積極買盤於25蚊附近密密收集,...畢竟佢NAV已升至HK$108.4/股,又未除淨末期股息HK$1.18/股。而淨淨現金嘅113.HK未來就可能受惠於香港的免關稅政策,外地及國內的高端旅客會樂意來港買奢侈品,當然,都需要些時間觀察一下才能夠確定。

重慶銀行(1963.HK)首季業績

大新銀行(2356.HK)持有4.585億股的重慶銀行(1963.HK)於晚上公佈了2025年第一季度的主要經營情況:~

營業收入RMB34.96億(同比↑6.05%)

淨利潤RMB17.07億(同比↑5.43%)

資產總額RMB9,316.99億(較2024年底↑8.76%)

貸款總額RMB4,735.89億(較2024年底↑7.48%)

存款總額RMB5,238.24億(較2024年底↑10.48%)

不良貸款率1.21%(較2024年底↓0.04%)

公司誓言「聚焦高質量發展 提質增效重回報」！💪🇨🇳👍

已換入857.HK

中午前忍痛沽出316.HK、836.HK,然後即入857.HK,原因只係由於筆者過去曾有多次從857.HK身上獲利的記錄,佢對筆者來講,算係一隻幸運股。上午收市前幾分鐘內攪掂晒,... 點諗到,12點過後,857.HK隨即公佈了佢母企之A+H股票回購計劃,... 857.HK,筆者錫晒您！😘

「Student高息倉」現持貨如下:~

阿一: 大新金融(440.HK)

阿二: 中石油(857.HK)

阿三: 迪生創建(113.HK)

反制老美 Student由自身做起

今日是筆者shopping day,本來早幾日已打算買一對老美品牌的波鞋,但今早去到鞋舖後,就改變了主意,改為購入一對祖國品牌的。為甚麼筆者會有如此決定？🤔

下午,筆者去超市shopping,今次,又刻意罷買不友善國的所有產品,包括佢哋嘅紅蘋果(即所謂蛇果)、新xx橙、地x香蕉,還有佢哋產出嘅凍肉產品、餅乾等等,筆者都刻意不去選購！改為買了澳洲蘋果、四川耙耙柑(到街市買)、菲律賓香蕉(幫襯x康超市)等等等等。

唔知點解,筆者今日買嘢比錢時,都感覺很爽、很暢快！✌️🥳

後記: 

香港時間2025年4月6日,Sunday早上: 筆者前日估計,老美自己的人民都會捱不住大總統的「逆全球決策」,會群起抗議之。卒之,今早就睇到新聞報導,話老美境內多地,已出現了示威活動！... 阿大總統,Student於此重覆給你溫馨提示: 咪嘥時間謀算下屆如何再度連任了,你今次真係會提早執包袱的！👎🙏🥱

支持中国🇨🇳大力反制老美

呢次大總統夠膽死,向全世界開關稅戰爭,Student估計,可能無須太耐,佢自己国家的人民會陸續捱不起經濟和資產於短期內急速改變的後果,於逼虎跳牆下,最後可能會群起抗議,反抗大總統,逼佢收回政策！

若情況比想像中更差更惡劣,大總統便毋須謀算下屆再連任的計劃了,因為,佢嘅選項最後很可能只得一個,就是,提早執包袱！👎😤