STUDENT SAYS 股海心經

2025年10月23日星期四

路遙知價值日久見大新 (2024年篇章)

2024年3月21日,中海油(883.HK)公佈了2023年之全年業績,由於筆者不滿意佢減派末期股息(HK$0.75/股→HK$0.66/股,當然還要扣減10%大陸稅！),故筆者於翌日上午,分三批次,以每股平均價HK$17.60,全數沽清了當時佔「Student高息倉」內第一重倉及本想長相廝守嘅883.HK。然此次無心插柳之投資決策,提供了筆者往後有財力可以較大注碼買入大新金融(440.HK)。

2024年3月28日中午,440.HK公佈了絕佳之2023年全年業績及末期股息。下午,筆者首次買入大新金融(440.HK),而當日共入了3批次,平均買入價為HK$17.35/股。

記得之後嘅一至兩個月內,筆者陸陸續續,以投資戶口內的備用現金增持佢,又把那些自己認為財務數據不及佢,例如PE,PB和Dividend yield等的指標都比不上440.HK的股份,陸續轉換成440.HK。又把收到440.HK的股息、及收到其他股份的股息,都絕大部份再投入去440.HK。

跟住到8月份,筆者感覺永旺百貨(984.HK)最終會拖累AeonCredit(900.HK),於是分批沽清了也曾是倉內第一大持股的900.HK,印象的出貨價範圍約在HK$5.8~5.5之內,套現所得全數投入440.HK,如果冇記錯,入貨成本大約係HK$20~21左近。

跟住到10月份嘅某一日,忽然發現悶股迪生(113.HK)有一大買盤求入「百幾萬股」@HK$5.15,自己突然心血來潮,就把心一橫,一個指令沽出了佢90萬股@HK$5.15,然後,又將套現陸續買入了440.HK,此批入貨成本大約係HK$25附近。

期間有不少其他股份的換馬行動,筆者現已記不清,也懶得去翻查舊交易記錄了！但肯定,當中有不少操作,最終都係換成為440.HK...

日後應該會有「路遙知價值日久見大新 (2025年篇章)」的！🙏🤔

風險提示: 此篇章只為給筆者自己留個文字追憶,絕對不是投資建議。有緣路過之網友們請謹記: 投資涉及風險,證券價格可升亦可跌,甚至變得毫無價值！

2025年10月9日星期四

Student says: 之前收到破自己單一次收股息記錄嘅金額,係收取「大大新」(440.HK) 2025年嘅中期股息,@HK$1.16/股(免稅),... 然後,自己就於佢除淨日之後,股價撻落嚟嘅折墮日子裏,逐少逐少地,再集郵佢,... 卒之,昨天再入埋佢最後2千大股,咁就又湊夠「大大新」於「Student高息倉」內萬位齊頭股數了,... 及連同上星期新加入的極少量佢乖仔「大新」(2356.HK)及前星期買番之前沽出嘅部份國浩(053.HK)股票,咁樣就將呢次收到「大大新」嘅中期股息,幾乎全數投入番市場了！📈🙏

股價當然有冷暖當然有淒酸

我有「大大新」

「大新」牛市中真摯熊市中衝刺

快活隨意...🎶

風險提示: 投資涉及風險,證券價格可升亦可跌,甚至變得毫無價值！

2025年9月12日星期五

周生生(116.HK)仍在市場重估中

留意到佢今日股價,似乎擺脫了過去一星期慣常跟著周大福(1929.HK)或六福(590.HK)的股價走向。

筆者是於今年5月中時才開始建佢倉,當時眼見金價愈升愈有,除了金礦股,其它具規模的中港金飾股股價也愈升愈高,唯獨是作風低調的周生生股價就斯人獨憔悴！

其實,周生生的市賬率(PB)一向最便宜,而且,近排似乎還未有大行出報告提示市場參與者,周生生持有的332.68萬股港交所(388.HK)股票,股價今年已大幅升值！

雖則此筆「浮盈」一向被周生生歸類去「其他全面收益」內,而不計入持續經營利潤中,但畢竟最後都會在公司盤數內反映的,結果就是提高每股資產淨值！

2025年上半年,周生生每股已賺了HK$1.34,當佢下半年盈利模式跟足2024年同期,即盈利只及上半年的一半,咁估計佢2025年全年也能賺到HK$2/股,咁即使股價升至HK$20,講緊嘅市盈率(PE)都只係10倍,仍然便宜過周大福(1929.HK)或六福(590.HK),莫講話要跟周六福(6168.HK)或老鋪黃金(6181.HK)作比較了！... 何況,以目前嘅金價走勢,佢下半年嘅盈利,真的只及上半年嘅一半... 咁少嗎？🤔

2025年9月3日星期三

沽貨換家傭

由於屋企舊印傭要在今年底前返去印尼與家人團聚,所以需要聘用新家傭。

於是,上星期六,家人和筆者就睇下中介網頁,尋找合眼緣的即將完約本地印傭,翌日,視像面試了幾位,從中揀了一位性格表現較為開朗的,再約佢於嚟緊嘅星期日到中介公司鋪頭面見、再瞭解、和決定簽約與否。

就係咁,筆者需要做一筆36萬港元的定期存款,作為符合其中一項聘請外傭的資產條件。

由於筆者近年採取全倉持股策略,因此,除非是在收到股息而又未及全數再投入買股的日子,筆者經常都只持有足夠應付日常生活開支的銀行活期存款,而沒有定期存款。

所以,為了要做一筆36萬的定存,筆者就要選擇沽些貨仔了！咁啱今日下午,見到有人掛牌求入5千股國浩(053.HK)@HK$75.50,筆者考慮到金額合適,便依依不捨地沽出此數量予此有緣人。

為何不捨得？... 因053.HK應將於本月底前公佈業績,而筆者算係對佢有信心的,... 不過算罷啦,自己嘅入貨成本係早排62~67蚊區間,何況現時還是有貨在手的,... 或許,等到9月18日,筆者收了阿大440.HK股息後,若其時053.HK價位與現在差不多,甚至更便宜,唔排除到時再增持番佢！

2025年8月27日星期三

畫虎畫皮難畫骨...

... 知股知值不知心！😤

估唔到116.HK半年持續經營業務盈利=HK$1.35/股👍、半年全面收益/盈利總額=HK$2.36/股👍、每股資產淨值於30/6/2025升至=HK$20.50/股(31/12/2024: HK$18.50/股)👍,但,管理層居然議決只派中期息=HK$0.21/股(2024: HK$0.15/股)！👎

唉,洗唔洗咁孤寒呀？😤

2025年8月26日星期二

那支是最便宜的珠寶金飾零售股？

答案是出咗「盈喜」的周生生(116.HK)。

周生生將於明日公佈截至30/6/2025之上半年業績及中期息,以「盈喜」通告盈利中位數HK$9.1億元,除以總發行普通股數6.71712億股,便得出周生生半年每股營運盈利已=HK$1.35/股。

而且,此數字並未包括它持有的332.68萬股港交所(388.HK)股票在這半年內股價由HK$294.80升至HK$418.80所產生的「浮盈」HK$4.125億元(或每股賺HK$0.614),此「浮盈」習慣被周生生列入於「其他全面收益」內。

筆者樂觀地亂估: 周生生於30/6/2025之「每股資產淨值」已升破20蚊港元,今年全財年的「每股除稅後盈利」起碼HK$2以上(不包括佢持有的388.HK股票股價升值),而今次中期息可能=HK$0.3~0.4/股(2024年: HK$0.15/股),以HK$0.4/股去計算,其實所涉及嘅數額都唔夠HK$2.7億元呢！🤔

2025年8月24日星期日

「Student高息倉」最新排位🧘‍♂️

阿大: 大新金融(440.HK)

阿二: 周生生(116.HK)

阿三: 國浩(053.HK)

......

(只顯示頭三隻長線倉位。🙏)

2025年4月10日星期四

已沽出857.HK

平手蝕手續費算數了,冇計！套現,因形勢比小弟強！小弟需要冷靜一下。

「Student高息倉」暫時只持有440.HK和113.HK。小弟現時反而對佢哋較有信心,這兩日見到440.HK有積極買盤於25蚊附近密密收集,...畢竟佢NAV已升至HK$108.4/股,又未除淨末期股息HK$1.18/股。而淨淨現金嘅113.HK未來就可能受惠於香港的免關稅政策,外地及國內的高端旅客會樂意來港買奢侈品,當然,都需要些時間觀察一下才能夠確定。