STUDENT SAYS 股海心經

2023年9月15日星期五

Aeon股價可以突破嗎?

目前「Student高息倉」內持有年期最長的股份為Aeon(900.HK),印象中好似是2016年開始買佢,之後大致上都是增持佢多過減持佢,最多之時佢係倉內嘅阿一,意思係以市價計佢佔倉內最大價值。

目前,佢係阿二。

回顧Aeon過去三年的股價圖,基本上佢在HK$4.60至HK$5.60之間上下游走,但其實佢「每股資產淨值」在最近三年內,已由HK$7.91(28/2/2020)升至HK$9.30(28/2/2023)了。

佢主力做好本身業務,盤數算係乾淨,冇物業重估收益,又冇參与大額金融投資。

筆者預期佢本月底便會公佈截至8月31日止之中期業績及股息。如無意外,筆者估計佢今次半年盈利應會同比錄得低雙位數字嘅增幅,而中期股息就照舊派發每股@HK$0.22。

至於今次佢股價能否突破HK$5.60,就只可以講句,聽天由命了!😇🙏^^

另外,本港一個月HIBOR連升8天,今早報5.00185厘,創了1個月新高,留意留意!😲

2023年9月14日星期四

883.HK 飲勝!🍻

太開心了,唯有新開一頁給大家寫寫感受,舒發下內心的興奮情緒!😃

後記:

已收市,恒指今日只係升咗39点至18,048点,萬八点幸保不失。而883.HK今日就收於HK$13.80,即是升咗HK$0.66或5%。若果計埋今年的兩次股息,扣除埋10%大陸税後,即是(HK$0.75+HK$0.59)x90%=HK$1.206,... 就計佢HK$1.20/股。

這代表883.HK已由去年12月31日的收市價HK$9.98 升至今日HK$13.80+HK$1.20=HK$15,... 即係升咗足夠50%!✌️^^

而且還未計入上一次已收咗之股息HK$0.75x90%=HK$0.675 的再投入回報!

(至於本月7日除咗淨的股息HK$0.59x90%=HK$0.531,就要10月18日才收到錢。)

同志們,飲勝!🤝🍻

2023年9月13日星期三

地產股慘被「逐隻劏」😫

估唔到今早輪到信和置業(083.HK)。

佢已是「淨淨現金」公司,於6月30日,佢每股淨淨現金為HK$3.40,一向給人印象是「穩陣過頭」,点知今早一樣有大户清算佢!... 始料不及也!

難道市場預料佢會中標剛已截標的啟德地塊?... 如果係咁,就真係「少做少錯」了!

唉,大江東去浪淘盡...

2023年9月12日星期二

被忽視的1126.HK

佢主力只係生產和銷售毛絨公仔、手板模型,不涉及高科技,而最大的銷售市場為美國,因此筆者認為佢會吸引到歐美基金光明正大、名正言順地持有佢!

佢上半年每股盈利為HK$0.493,上升咗66%!

佢起碼於過去連續四年(筆者從aastocks內睇到嘅!),下半年嘅盈利「最少兩倍以上於」上半年嘅盈利。以此推算,佢今年全年盈利或者會是10億港元以上,等於每股盈利為HK$1.48以上!

佢昨日股價蓄勢待發,以全日最高位HK$4.10收市,... 咁你哋話佢股價短期內應該值幾多錢喇!🤔

呀,幾乎講漏咗! 佢還未除淨中期股息每股HK$0.20㖭呀!🤑

佢... 叫做德林國際,英文名Dream International Limited。記住: 只要有夢想,凡事可成真!🙏^^

I have a Dream!😇

2023年9月11日星期一

假如佢下年派息比率只得40%

新地(016.HK)預早表態,將從2023/24年度起「恢復」派息率政策至介乎40~50%,以反映低於預期的房地產銷售和利潤率。剛宣佈的全年業績,此政策則為60%。

筆者見到有投資者以45%(中位數)或50%的派息比率去預測現市價016.HK的「未來股息率」,但筆者認為買股票最好「作最壞打算」去持貨,才能避免出現「意料之外」時自己「失晒預算」、瞓唔着覺!

因此,假如新地(016.HK)2023/24年度只把派息比率定於40%,大家認為佢股價應該值幾多呢?🤔

又比較一下: 較早時候,中海油(883.HK)的中期業績,派息比率就是只約40%而已,... 未來會有上升的空間嗎?🤔

2023年9月9日星期六

Peter Wennink的看法

荷蘭光刻機巨頭ASML行政總裁Peter Wennink在當地電視節目上表示:「完全孤立中國是沒有希望的,如果我們不分享技術,他們就會自己去研究。」

Wennink指,中國有14億人口,當中很多人都很聰明,他們會提出他人還沒想到的解決方案,迫使他們變得非常創新。他認為,試圖透過禁止技術移民和出口管制等方式孤立中國,實際上會削弱西方自己。

Wennink警告稱,保護主義就是試圖不与其他國家合作來保護自己經濟,但這樣會導致自身應對能源及社會數字化領域重大轉型的能力較差,然後必須接受後果並進口中國汽車,因為它們更好、更便宜。他說:「這已經非常明顯,例如今年最好的電池和電動車都來自中國。在德國,他們剛剛舉辦了一場大型車展,令人驚訝。在中國,他們變得更努力、更快、更專注,而我們則太自滿。」