STUDENT SAYS 股海心經

2024年12月11日星期三

升升跌跌真真假假

🎺🎼

失去股票的裝作很瀟灑,

得到股票的痛得沒說話,

倉似真似假吹得亂如麻,

我最愛佢你相信嗎？

升的話跌的話那個可怕？

升的A 跌的H 都可愛嗎？

升的樂跌的淚哪個調查？

我說信佢你信是嗎？

股票總有幻覺股市總有假話,

升升跌跌不要追查,

扑中一隻好嗎以後躺著算啦,

短期賺蝕不必理它！

升也許會害怕跌也許更好吧？

升與跌又何懼應該睇化！

大新金融只要相信它！

大新金融一世擁有它！🎺🎶

利申: 筆者持有大新金融(440.HK)。

2024年12月9日星期一

迪生(113.HK)卒之開始回購了

2024年12月9日:~

1,500股@HK$4.90/股, 盛惠HK$7,350！😝

之前潘爵士於中期業績「主席報告書」內提到,董事局已批准公司於未來一年內回購最多1億港元之股份。

利申: 筆者持有迪生(113.HK)。

大新金融与重慶銀行

Student想指出:~

1. 大新金融(440.HK)乃大新銀行(2356.HK)之母企,前者持有後者之總發行股數約74.37%。而大新銀行(2356.HK)才是直接持有重慶銀行(1963.HK)總發行股數中的約13.2%(=約4.585億股)。

2. 過去十年多,大新銀行(2356.HK)以「投資公平值低於賬面值」為理由,不斷為重慶銀行(1963.HK)之投資作減值準備。Student想指出,重慶銀行(1963.HK)過去年年皆賺錢,所以佢「賬面值」基本走勢都是向上的,... 如此每年將「投資公平值」與「賬面值」作比較,不「吃力不討好」才怪！🤮

3. 大新孖寶(意指440.HK和2356.HK)和重慶銀行(1963.HK)的財務年結日同為每年的12月31日。重慶銀行(1963.HK)於2023年底之股價為HK$3.96,於2024年6月底之股價為HK$5.04,而於上星期五(2024年12月6日)之收市價則為HK$5.92。(後記: 佢今日收市價: HK$5.99！)👍

利申: 筆者持有440.HK。

2024年12月3日星期二

莫等待

🎤🎼

莫等待... 低位不易復來... 勿讓大新終被收購去... 莫等待

莫等待... 股災過後牛市來... 淡友終悔今天不持貨... 莫等待

別戀道瓊斯... 惜取中港市... 發奮買進不容遲... 同胞今朝共立志

莫等待... 低位不易復來... 勿讓大新終被收購去... 莫等待... 莫等... 待 🎶📈🙏🤑

Student says,"高負債及每股資產淨值只得HK$1.95的香港寬頻(1310.HK)可以被中移動(941.HK)以賬面溢價168%收購,那麼,如果大新銀行(2356.HK)被中資銀行相中,收購價會係每股幾多錢呢？"🤔

利申: 筆者沒有內幕消息,也沒持有上述股份,但就持有大新金融(440.HK),而大新金融乃是大新銀行(2356.HK)之母企。

2024年12月2日星期一

Student上日沽了8萬股2388.HK@HK$24.20,然後將套現的資金於上日及今日合共增持了5萬股440.HK@HK$24.75~HK$25,又於上日近尾市時入了9萬股113.HK@HK$4.72,本想今日繼續多買1萬股,但可惜賣方全日冇人肯掛牌@<HK$4.72出貨。另外,今下午入了5萬股857.HK@HK$5.44,因見國際油價近一星期都算穩定,Student認為3桶油中,857.HK於此油價水平可算是上下游皆可兼顧。

如此這般,「Student高息倉」最新持貨如下:~

阿大: 大新金融(440.HK)

阿二: 中銀香港(2388.HK)

阿三: 迪生創建(113.HK)

阿四: 天津發展(882.HK)

阿五: 中國石油股份(857.HK)

阿六: 中海石油化學(3983.HK)

Student預期此高息倉的「年股息收入」繼續創出歷史新高,感恩了！🙏🤑

2024年11月29日星期五

迪生派息一啲都唔算慷慨

大家都係主打奢侈品零售業,隔籬東方表行(398.HK)上財年每股賺HK$0.514,全年共派息@HK$0.515/股,今財年半年每股賺HK$0.245,中期股息@HK$0.246/股,即是基本上係「派盡」。

依家迪生(113.HK)上財年每股賺HK$0.89,全年派息合共@HK$0.45/股,今次半年每股賺HK$0.334,中期股息就依舊@HK$0.10/股。

再考慮埋113.HK佢於2024年9月30日的每股資產淨值=HK$9.05/股(398.HK=HK$3.75/股) 及每股「淨淨現金」*=HK$5.19/股(398.HK=HK$0.73/股)後,你話呀迪生又怎會算係慷慨呢？🙅

*「淨淨現金」=現金及銀行結餘 - 總負債

2024年11月21日星期四

一念天堂一念地獄

迪生(113.HK)昨天收市後發佈了「盈警」通告,話截至9月30日之半年盈利,與去年同期比較,約下跌了40%,然而董事局強調,集團之財政狀況及現金淨額「仍持續非常強健」。

潘主席兩父子目前正被證監會指控涉嫌內幕交易,並已在高等法院展開法律程序。

相信睇開此網誌的網友們都知道,筆者曾經重貨113.HK,雖然依家冇貨在手,但對佢仍然係多少有些感情嘅！因此,對於佢近排嘅負面消息,筆者係感嘆良多！

筆者又留意到,最近東方表行(398.HK)公佈了業績,雖然半年盈利有下跌14%,但股價仍能穩定向好,今早現價HK$3.82,已超過了它於6月30日之每股資產淨值HK$3.75,... 為何佢股價咁叻？... 筆者估計係由於佢肯慷慨地派「超高股息」給全體股東,所以股東們皆「惜貨如金」。

筆者認為,依家潘主席有官司纏身,短期內佢應該唔敢再增持公司的股份了！希望佢痛定思痛,也想通「因果報應」,以後會慷慨地派更高股息予全體股東,共同分享公司過去嘅豐碩成果。

後記(寫於晚上): 今日113.HK股價收於HK$4.37,全日成交共55萬股,平均成交價約=HK$4.42。筆者個人認為,迪生的現股價其實已有值博率,主要原因係佢今次半年業績並非虧損,而係有盈利賺約HK$0.33/股,佢絕對可以依舊派發中期股息@HK$0.10/股,這=派息比率30%, 而且佢每股資產淨值(NAV Per Share)應該仍然企於HK$9/股附近(31/3/2024: HK$9.06/股),及仍然係「超級淨淨現金公司」！最不明朗嘅係,身為大股東嘅潘主席及其公子現正被官司纏身,結果實屬難料,... 不過,唔排除若果佢哋兩父子最終需要離開董事局,可能會觸發潘主席忽然大發慈悲,離職前先嚟過「派發巨額特別股息」🤔,畢竟... 「錢」到手先係自己嘅！🤑